Plantun de Prouvènço

Pèr coumpara dos planto d'encò nostre

Chaetonychia cymosa & Cyperus esculentus

Chaetonychia cymosa

Caryophyllaceae Illecebraceae

Nom en français : Paronyque en cyme.

Descripcioun :
La parounico-en-cimello, dóu gènre Chaetonychia, trachis dins li sablo e en ribo de riéusset. Es uno pichoto planto pas trop eisado de vèire e que porto de cimello de flour proun groupado. Li fueio, coume li sepalo de flour soun acabado pèr uno arèsto. La planto èi marcado sus la listo roujo, categourìo NT, quàsi menaçado.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 3 à 10 cm
Fueio : alterno
Tipe bioulougico : Teroufite
Cicle bioulougico : Planto de l'an

Gènre : Chaetonychia
Famiho : Caryophyllaceae
Famiho classico : Illecebraceae

Ordre : Caryophyllales

Coulour de la flour : Blanco
Petalo : 5
Ø (o loungour) flour : 3 à 4 mm
Flourido : Printèms

Sòu : Si
Autour basso e auto : 0 à 600 m
Aparado : Noun
Abriéu à jun

Liò : Sablo - Riéusset
Estànci : Termoumediterran à Subremediterran
Couroulougi : Eurimediterrano-Ouèst
Ref. sc. : Chaetonychia cymosa (L.) Lam., 1779 (= Paronychia cymosa (L.) DC., 1804 )

Triangle(-manjadis)

Cyperus esculentus

Cyperaceae

Nom en français : Souchet comestible.

Descripcioun :
Lou triangle-manjadis trachis dins li limas de ribiero o li culturo. Pèr l'ouro n'i'a pas gaire au nostre, soulamen un pau au couchant. Se recounèis à sis enflourejado jauno daurado e subretout à si cabosso o tubercule. Douno un pau d'èr à Cyperus rotundus que fai de cabosso negro. La varieta presentado eici, Leptostachyus, èi naturalisado (óurigino Americo de l'uba).

Usanço :
Coume lou dis soun noum es uno planto manjadisso. En Espagno s'adoubo emé lou tubercule l'horchata de chufa, valènt-à-dire l'ourjado de triangle. Se fai tambèn un òli de qualita, richo en vitamino E e bon pèr la pèu.